Upp með hendur segir Prinsinn

Þá er prinsinn kominn heim til sín í fyrsta skiptið:) Ég svaf á spítalanum í nótt því að Þórunn var orðin svo þreytt eftir andvökunóttina þar á undan. Þetta hófst með látum því að hann vaknaði eftir aðeins 1 klst og heimtaði allan pakkann, mjólk úr brjóst, mjólk sem ábót úr pela, skipta um bleyju og endalaust knús aður en hann samþykkti að fara að sofa aftur:) - og mér var hætt að lítast á blikuna og bjóst við að vera vakinn með 1 klst fresti allan nóttina og næstu vikur! - en svo svaf hann barasta í 3 klst og þá var skipt um allt í snatri og hann svo svaf til 7.15 - þannig ég get nú ekki sagt að þetta hafi verið eins rosalegt eins og upphafið gaf í skyn:) Síðan fórum við heim um hádegi eftir að læknar voru búnir að skoða, pota, stinga fram og til baka. Hann kunni strax vel við sig hér og hefur verið gersamlega sallarólegur síðan hann kom. Hefur varla grátið nema rétt þegar hann var orðinn svangur. Hann sá sjálfan sig í spegli og fannst það voðalega skrýtið - allaveg kom stór undrunarsvipur á hann he he. Þórunn er enn voðalega slöpp, því að hun missti svo mikið blóð - um 1.5 lítra - og neitar að fá blóðgjöf frá læknum. Svo sem skil það - þannig að hún er enn bara að jafna sig og sefur mikið. Hún reynir að borða mikið járn því að það á að flýta fyrir blóðframleiðslu.